Karateçilərimiz Yunanıstanda keçirilən dünya çempionatında 11 qızıl medal qazanıb

Azərbaycan Karate-Do Federasiyasının üzvləri Yunanıstanda keçirilən dünya çempionatında uğurla çıxış ediblər.

Halkida şəhərində təşkil olunan turnirə 65 nəfərlik heyətlə yollanan komandamız fərdi növdə 11 qızıl medal qazanıb.

Yeniyetmə karateçilərimizdən Xədicə Mürsəlova, Mədinə Kazımova, Musa İsmayılov, Nicat Müslümov, Eldar Qurbanlı, Vladimir Qrimzin və Məhyəddin Cəfərli baş mükafata yiyələniblər.

Eyni uğuru gənclərin mübarizəsində Rəsul Abasov, Yusif Tağıyev və Zəki Cəfərzadə də təkrarlayıb.

Böyüklər arasında yarışda isə Samir Məmmədov fəxri kürsünün ən yüksək pilləsinə qalxıb. Daha 2 karateçimiz – Ülvi Məmmədov və Kənan Babayev isə 3-cü yeri tutublar.

Qadınların mübarizəsində də idmançılarımızın çıxışı uğurlu alınıb. Təmsilçilərimizdən Alika Semixova və Humay Həsənli turniri 2-ci, Səma İmanzadə isə 3-cü pillədə başa vurub.

Qeyd edək ki, Azərbaycan Karate-Do Federasiyasının prezidenti, Dünya Müasir Döyüş növləri Federasiyasının Avropa üzrə vitse-prezidenti Arif Məmmədovun rəhbərliyi ilə yarışa qatılan karateçilərimiz komanda yarışında da etimadı doğruldublar. Qadınlardan ibarət kollektivimiz yarışda gümüş, yeniyetmələrdən ibarət komandamız isə qızıl medal qazanıb.