Kilian Mbappe "Real Madrid" klubu ilə vidalaşa bilər

“Real Madrid” klubu əsas ulduzlarından olan Kilian Mbappeni itirə bilər.

Bu barədə xarici mediada xəbərlər paylaşılır.

İddia olunur ki, 25 yaşlı forvard “los blankos”da istədiyi mövqedə oynamadığı üçün özünü xoşbəxt hiss etmir və komandadan getmək istəyir.

Baş məşqçi Karlo Ançelotti isə onun mövqeyini dəyişmək barədə düşünmür. Bu səbəbdən K.Mbappe “Liverpul”dan gələn təklifi dəyərləndirmək niyyətindədir.

Son xəbərlərə görə, İngiltərə nəhəngi ulduz oyunçu üçün “Kral klubu”na 150 milyon avro təklif etməyi planlaşdırır.

Qeyd edək ki, Kilian Mbappe iyul ayından “Real Madrid”in formasını geyinir. Bu müddət ərzində 14 matça çıxan təcrübəli hücumçu 8 qol və 2 məhsuldar ötürmə müəllifi olub. Eyni zamanda o, komanda ilə UEFA Super Kubokunda da qalib gəlib.

Maraq üçün deyək ki, məşhur “Transfermarkt” portalına əsasən, dəyəri 180 milyon avro olan Kilianın “Real”la müqaviləsi 2029-cu ilə qədərdir.

Əlavə edək ki, 2017-ci ildən Fransanın əsas millisinə də dəvət olunan K.Mbappe 86 oyunda 48 qol vurmaqla yanaşı, komanda ilə 2018-ci il dünya çempionatının qalibi olub.