Kriştiano Ronaldo qol sevincini səcdə edərək yaşadı

Dünya futbolunun superulduzu Kriştiano Ronaldo növbəti qolunu səcdəyə gedərək qeyd edib.

Səudiyyə Ərəbistanı çempionatında 28-ci turun “Əl-Nəsr” – “Əl-Şabab” matçında fərqlənən 38 yaşlı veteran qoldan sonra müsəlman azarkeşlərə və komanda yoldaşlarına ehtiram nümayiş etdirib.

Ulduz futbolçunun qol sevinci fanatlar tərəfindən böyük rəğbətlə qarşılanıb. Sosial şəbəkələrdə isə Kriştianonun islam dinini qəbul etdiyi barədə rəylər paylaşılıb.

Qeyd edək ki, “Əl-Şabab”la qarşılaşmada K.Ronaldonun qolu həm də komandasına qələbəni gətirib. Görüş “Əl-Nəsr” kollektivinin 3-2 hesablı qalibiyyəti ilə başa çatıb. Bu nəticədən sonra “Əl-Nəsr” 63 xalla çempionatda 2-ci yerdədir. Komanda lider “Əl-İttihad”dan 3 xal geri qalır.