“Liverpul” gürcüstanlı məşhur futbolçunu transfer edib

“Liverpul” klubu Gürcüstan millisinin liderlərindən Giorgi Mamardaşvilini transfer edib.

Mersisaydlılar bunun üçün “Valensiya”ya 30 milyon avro ödəyiblər. Tərəflər arasında razılığa əsasən, 24 yaşlı qapıçı cari mövsümdə də “yarasalar”ın formasını geyinəcək. Növbəti ildən isə “qırmızılar”a qoşulacaq.

Qeyd edək ki, son Avropa çempionatında Gürcüstan yığmasının heyətində inamlı oyunu ilə diqqət çəkən Giorgi 2022-ci ildən “Valensiya”nın üzvüdür. 850 min avroya “Dinamo Tbilisi”dən cəlb olunan oyunçu ötən mövsüm 37 görüşdə iştirak edib və qapısından 41 top buraxıb. Ümumən isə istedadlı futbolçu “yarasalar”ın forması ilə 102 matçda meydana çıxıb.