“Liverpul” “Mançester Yunayted”ə futbol dərsi keçdi

İngiltərə çempionatında 26-cı turun mərkəzi matçı "Liverpul" və "Mançester Yunayted" arasında olub. Əzəli rəqiblərin mübarizəsində "qırmızılar" “mankunianlar”ı darmadağın edib.

Fasiləyə Qakponun qolu sayəsində minimal üstünlüklə yollanan mersisaydlılar 2-ci yarıda 6 qol vurublar. Qakpo, Salah və Nunyez dublla yadda qalıb. Son nöqtəni Firmino qoyub. Liverpul - Mançester Yunayted:7-0. İnamlı qələbə sayəsində xallarının sayını 42-yə çatdıran "Liverpul" 5-ci pillədə qərarlaşıb. 92 ildən sonra ilk dəfə bu qədər böyük hesabla uduzan "Yunayted" isə 49 xalla 3-cüdür.

Son qarşılaşmalarda yaxşı formada olan "Yuventus" A Seriyasında 25-ci tur çərçivəsində "Roma"nın qonağı olub. Matçın taleyini 1 top həll edib. 53-cü dəqiqədə "Qoca Sinyora"nın qapısına yol tapan Canluka Mançini "canavarlar"a 3 xal qazandırıb. Bu nəticədən sonra 47 xalı olan "Roma" 4-cü yerdədir. Bütün yarışlarda 7 görüşdən sonra uduzan "Yuventus" isə 35 xalla 8-cidir.

La liqanın lideri "Barselona" 24-cü turda "Valensiya"nı qəbul edib. Bu oyunda da azarkeşlər 1 qol görüblər. 15-ci dəqiqədə Rafinyanın dəqiq zərbəsi kataloniyalılara növbəti qalibiyyəti gətirib. Minimal hesabla güclü olan "blauqrana" 62 xalla ilk pillədəki mövqeyini möhkəmləndirib. "Barsa" 2-ci yerdə olan "Real"ı 9 xal qabaqlayır. 23 xalı olan "Valensiya" isə 19-cudur.