Millətlər Liqasında İngiltərə və İtaliyanın uğursuzluğu

UEFA Millətlər liqasının 3-cü turunda gözlənilməz nəticələrdən biri Londonda qeydə alınıb.

“Uembli” arenasında Yunanıstan yığmasını qəbul edən İngiltərə seçməsi 1-2 hesabı ilə uduzub. Hesabı 49-cu dəqiqədə qonaqların üzvü Vangelis Pavlidis açıb. Meydan sahibləri 87-ci dəqiqədə Cud Bellingemin topu ilə tarazlığı bərpa etsələr də, əsas vaxta artılan dəqiqələrdə Pavlidis dublunu rəsmiləşdirib.

Beləliklə, B liqasının 2-ci qrupunda 3-cü qələbəsini qazanan Yunanıstan kollektivi maksimum nəticə ilə 1-ci yerdədir. İngiltərə millisi isə 2-cidir.

Romada təşkil olunan digər matçda İtaliya və Belçika futbolçuları üz-üzə gəliblər. Apennin yarımadasının təmsilçiləri artıq 1-ci dəqiqədə Kambyasonun qolu ilə irəli çıxıblar. 24-cü dəqiqədə Mateo Reteqi 2-ci topu “qırmızı şeytanlar”ın qapısına göndərib.

Az sonra İtaliya seçməsi azlıqda qalıb. Lorenso Pelleqrini birbaşa qırmızı vərəqə ilə cəzalandırılıb. Bundan sonra qonaqlar dönüş edə biliblər. Əvvəlcə fasilə ərəfəsində Maksim De Köyper toplardan birinin əvəzini çıxıb. 1 saatın tamamında isə Leandro Trossard komandasını məğlubiyyətdən xilas edən qolu vurub.

Qarşılaşma 2-2 hesabı ilə bitib. 3 turdan sonra 7 xal toplayan “Skuadra Adzurra” A liqasının 2-ci qrupunda 1-ci, 4 xalı olan Belçika isə 3-cü yerdədir.