MMA döyüşçümüz Nəriman Abbasovun növbəti rəqibi məlum oldu

Azərbaycanlı məşhur MMA ustası Nəriman Abbasovun növbəti rəqibi müəyyənləşib.

Bu barədə 28 yaşlı idmançının məşqçisi Şəhriyar Abbasov şəxsi feysbuk hesabında məlumat verib. Sosial şəbəkədəki postda Nərimanın qazaxıstanlı Fanil Rafikovla görüş üçün müqavilə imzaladığı bildirilib. “Naiza Fighting Championship” təşkilatı çərçivəsində keçiriləcək döyüşün martda baş tutması gözlənilir.

Qeyd edək ki, N.Abbasovun rəqibi “Noqay” ləqəbli F.Rafikov MMA yarışlarında 27 görüşdə iştirak edib. 21 dəfə qalib gələn idmançı, 6 dəfə oktaqonu məğlub tərk edib. O eyni zamanda “Naiza” təşkilatının sabiq çempionudur. Daha əvvəl AMC təşkilatının kəmərini dəfələrlə uğurla müdafiə edən Nəriman Abbasov isə ümumən karyerası ərzində 32 qarşılaşmada qüvvəsini sınayıb. 12-si nokautla olmaqla 28 döyüşdə qələbə qazanan “Bayraktar” ləqəbli idmançı cəmi 4 dəfə uduzub. O, sonuncu dəfə UFC-də yarışmaq hüququ verən “Dana White Contented Series” çərçivəsində braziliyalı İsmael Bonfimə məğlub olub.