“Neftçi” yeni idman direktoru Yens Anderssonun təqdimatını keçirib

“Neftçi” klubunun yeni idman direktoru Yens Anderssonun təqdimat mərasimi keçirilib.

Bununla əlaqədar təşkil olunan tədbirdə klubun prezidenti Fərrux Mahmudov, eləcə də “ağ-qaralar”ın rumıniyalı baş məşqçisi Adrian Mutu iştirak edib.

“Ümid edirəm ki, təcrübəmiz hər iki tərəfə faydalı olacaq. Hələlik əsasən klubla tanış olurdum. "Neftçi"nin akademiyası ilə də məşğul olmalıyam. Amma bunun üçün vaxt tələb olunur. İlk növbədə Azərbaycan futbolunu tanımalıyam. Hələlik təcrübəm o qədər də çox deyil”, – Yens Andersson söyləyib.

“Neftçi”nin baş məşqçisi Adrian Mutu Yens Anderssonun təyinatına münasibət bildirib. 44 yaşlı mütəxəssis komandasının çıxışını da dəyərləndirib:

“Eyni məqsəd üçün birlikdə işləməli və əməkdaşlıq etməliyik. Yens Anderssonun uğur qazanacağına inanıram. Oyunumuza gəldikdə isə hazırda bizə yaxşı nəticələr lazımdır. Növbəti turda “Sabah”la qarşılaşacağıq. Yaxşı komandadır. Buna görə də matç ağır keçəcək. Bununla belə, sonadək mübarizə apararaq əlimizdən gələni edəcəyik".

Qeyd edək ki, Yens Andersson sentyabr ayında “Neftçi”nin idman direktoru təyin olunub. Onun müqaviləsi 2025-ci ilədək nəzərdə tutulub.