Paytaxtımızda kəmər güləşi üzrə Avropa çempionatına start verilib

Paytaxtımızın ən əzəmətli idman qurğularından Milli Gimnastika Arenasında daha bir mötəbər turnirə start verilib.

İyirmiyə yaxın ölkədən olan idmançılar kəmər güləşi üzrə 3-cü Avropa çempionatında qüvvələrini sınayacaqlar. 16 illik fasilədən sonra Bakıda təşkil olunan turnirin açılış mərasimində əvvəlcə yarışa qatılan ölkələrin bayraqları nümayiş etdirilib.

Daha sonra Beynəlxalq Kəmər Güləşi Federasiyasının baş katibi Xabir Xabibullin çıxış edərək yüksək təşkilatçılıqla əlaqədar ölkəmizə təşəkkürünü bildirib. Gənclər və idman nazirinin müavini Fərhad Hacıyev də kəmər güləşi üzrə qitə çempionatı ilə bağlı fikirlərini bölüşərək ölkəmizdə qeyri-olimpiya, xüsusən də ənənəvi idman növlərinə diqqət yetirildiyini vurğulayıb. Azərbaycan Respublikasının Dövlət Himni səsləndirilikdən sonra tədbir nümunəvi çıxışlarla davam edib.

Qeyd edək ki, kişilərin həm sərbəst, həm də klassik növdə 8 çəki dərəcəsində yarışacağı turnirdə qadınlar 5 çəkidə qalibləri müəyyənləşdirəcəklər. Ölkəmizin 42 idmançı ilə təmsil olunduğu yarışa oktyabrın 4-ü yekun vurulacaq.