“Prezident Kuboku-2025” reqatasına qatılan komandaların paradı keçirilib

Ümummilli lider Heydər Əliyevin anadan olmasının 102-ci ildönümünə həsr edilən avarçəkmə üzrə “Prezident Kuboku-2025” beynəlxalq reqatasında iştirak edəcək komandaların rəsmi paradı keçirilib.

Mingəçevir şəhərinin mərkəzində təşkil olunan paradda Azərbaycan, Gürcüstan və Türkiyə ilə birlikdə ümumi 17 ölkənin komandası iştirak edib.

Azərbaycan Kanoe və Avarçəkmə Federasiyasının prezidenti Vüqar Əhmədov, Avropa Kanoe Assosiasiyasının prezidenti Yan Zunqrana, Mingəçevir Şəhər İcra Hakimiyyətinin başçısı İlham İsmayılov, turnirdə iştirak edən xarici federasiyaların rəhbərləri və idman ictimaiyyətinin nümayəndələri ulu öndər Heydər Əliyevin abidəsini ziyarət edib, önünə gül dəstələri düzərək ümummilli liderin xatirəsinə ehtiramlarını bildiriblər.

Rəsmi hissədən sonra müxtəlif rəqs və musiqi nömrələri təqdim olunub. Turnir iştirakçıları ansamblla birlikdə rəqsə qoşulublar.

Aprelin 30-da Qarabağın daha bir dilbər guşəsi olan Suqovuşanda “Prezident Kuboku-2025” beynəlxalq reqatasının rəsmi açılış mərasimi və 200 metr məsafədə yarışlar baş tutacaq.

Reqata mayın 1-2-də Mingəçevir “Kür” Olimpiya Tədris-İdman Mərkəzində davam edəcək. Burada komandalar avarçəkmənin kayak, kanoe və akademik növündə müxtəlif məsafələrdə mübarizə aparacaqlar.