“Qarabağ” klubu “Səbail”lə qarşılaşıb

15 sentyabr 2024 323 baxış

Azərbaycan Premyer Liqasının 6-cı turunda daha bir matç keçirilib. Son çempion “Qarabağ” “Səbail” kollektivi ilə üz-üzə gəlib.

“Azərsun Arena”da baş tutan qarşılaşmada hesabı meydan sahibləri açıblar. 5-ci dəqiqədə Leandro Andrade “dənizçilər”in qapısını dəqiq nişan alıb. “Köhlən atlar” fasiləyə minimal üstünlüklə yollanıblar.

İkinci yarıda da hücumlarını davam etdirən ağdamlılar fərqi artırıblar. 56-cı dəqiqədə L.Andrade dubl edib. İki dəqiqə sonra “Səbail”in heyətindən Fərid Nəbiyev toplardan birinin əvəzini çıxsa da, bu, sadəcə təsəlli olub. “Qarabağ”-“Səbail” 2-1.

Qeyd edək ki, bu qələbə sayəsində xallarının sayını 12-yə çatdıran “Qarabağ” turnir cədvəlinin ikinci pilləsində qərarlaşıb. Komanda lider “Turan Tovuz”dan 1 xal geri qalır. “Səbail” isə 4 xalla 8-ci pillədədir.

Əlavə edək ki, “Qarabağ” növbəti turda “Neftçi” ilə qarşılaşacaq. “Səbail” isə “Sabah”ı qəbul edəcək.

#Azərbaycan Premyer Liqası