“Qarabağ” Konfrans liqasında “Gent”in qonağı olub

24 fevral 2023 217 baxış

“Qarabağ” klubu UEFA Konfrans liqasında növbəti görüşünü keçirib.

1/16 final mərhələsinin ilk matçında 1-0 hesablı qələbə qazanan komandamız bu dəfə Belçikada “Gent”in qonağı olub. “Gelamco Arena”dakı oyuna hər iki tərəf istəkli başlayıb. Fasiləyədək həm Deyvi Rof, həm də Luka Quqeşaşvilinin qapısı yaxınlığında təhlükəli vəziyyətlər olsa da, hesab açılmayıb. 74-cü dəqiqədə isə meydan sahibləri istəklərinə nail olublar. Gift Emmanuel Orban “köhlən atlar”ın qapısına yol tapıb.

Əsas vaxtda başqa qol olmayıb. Belə olan halda 2 görüşün nəticəsinə görə ümumi hesab 1-1 olduğundan əlavə 30 dəqiqəyə ehtiyac yaranıb. Burada da komandalar qol vurmadığından penaltilər seriyasına keçid edilib.

Azərbaycan çempionunda Riçard, Diakabi və Toral Bayramov hədəfi dəqiq nişan alıb. Yassin Benzianın cəhdi isə uğursuz olub. Belçika təmsilçisində bütün zərbələr dəqiq olduğundan “Gent” penaltilər seriyasında 5-3 hesabı ilə qalib gələrək 1/8 finala yüksəlib.

#UEFA Konfrans liqası