“Qarabağ”ın məşhur legioner futbolçusu klubdan ayrılacaq

“Qarabağ”ın legionerlərindən Marko Veşoviç komandadan ayrıla bilər.

“Köhlən atlar” müqaviləsi bu yayadək olan futbolçuya hələ də yeni sözləşmə təklif etməyib. Bununla əlaqədar Avropanın müxtəlif klubları Markonun dəvətinə maraq göstərir.

Monteneqrolu oyunçunun Polşaya qayıtmaq ehtimalı da yüksəkdir. Hazırda bütün təklifləri nəzərdən keçirən Veşoviçin mövsümün sonuna doğru yekun qərar verəcəyi gözlənilir.

Qeyd edək ki, əvvəlki dövrlə müqayisədə əsas heyətdə daha az yer alan Marko 2021-ci ildən “Qarabağ”ın üzvüdür. Uzun müddət komandanın liderlərindən olan Veşoviç cari mövsümdə 24 görüşə qatılıb.

Ümumilikdə isə Ağdam təmsilçisinin forması ilə 127 matçda 5 qolun müəllifidir.

33 yaşlı müdafiəçi daha əvvəl Serbiyanın “Srvena Zvezda”, İtaliyanın “Torino” və “Spetsiya”, Xorvatiyanın “Riyeka”, eləcə də Polşanın “Legiya” klublarında çıxış edib.