“Qızıl Top”u qazanacaq futbolçu açıqlanıb

Futbol aləminin ən dəyərli mükafatı – “Qızıl top”u qazanacaq oyunçunun adı açıqlanıb.

Təqdimetmə mərasimi oktyabrın 28-də Parisdə təşkil olunacaq mükafatın yeni sahibi “Real Madrid”in ulduzu Vinisius Junior olacaq.

Bununla bağlı İspaniyanın məşhur “Marca” nəşri xəbər dərc edib. Bildirilib ki, braziliyalı oyunçu da artıq “Qızıl top”u qazanacağı barədə məlumatlıdır.

Qeyd edək ki, ötən mövsüm bütün yarışlarda 49 matçda “Real”ın formasını geyinən Vinisius 26 qol və 13 məhsuldar ötürmə ilə yadda qalıb. Komanda ilə Çempionlar Liqası və La Liqada qalib gələn 24 yaşlı vinger həm də İspaniya Super Kubokunun qalibi olub.

Xatırladaq ki, “France Football” nəşri tərəfindən 1956-cı ildən təsis edilən “Qızıl top” mükafatının son sahibi “İnter Mayami”nin üzvü Lionel Messidir. Argentinalı veteran ötən il keçirilən qala gecəsində 8-ci dəfə ilin ən yaxşı futbolçusu seçilib.