"Araz-Naxçıvan"ı çox təriflədik…" | İDMANDA NƏ BAŞ VERİR?

“İdmanda nə baş verir?” podkastının növbəti buraxılışı yayımlanıb.

Bu dəfə podkastın qonağı idman jurnalisti Kənan Məstəliyev olub.

Buraxılışda futbol klublarımızın avrokuboklardakı çıxışı haqqında fikir mübadiləsi aparılıb.

K.Məstəliyev “Qarabağ”ın Şimali Makedoniyanın “Şkendiya” klubu ilə ilk matçını şərh edib.

“Sözügedən oyunda Ağdam klubu üstün tərəf idi. Onun qələbə qazanması təsadüfi olmadı. “Qarabağ” “Şkendiya” ilə səfər matçında oyunun birinci hissəsini yaxşı oynadı. İkinci hissənin əvvəlindən isə komandanın fiziki hazırlığı yaxşı olmadığı üçün məcburən geri çəkildilər. Cavab matçına gəlincə isə düşünürəm ki, “Şkendiya” “Köhlən atlar”ın keçə biləcəyi rəqibdir”, ‒ deyə o bildirib.

K.Məstəliyev həmçinin “Araz-Naxçıvan”ın “Omoniya” ilə görüşündə məğlubiyyətinin səbəblərinə aydınlıq gətirib.

“Matçın əvvəlində “Omoniya” 1-2 qol vurandan sonra komanda özünə gələ bilmədi. “Araz-Naxçıvan”da arxayınlıq var idi. Komandanı “Aris”lə matçdan sonra çox təriflədik. Buna görə futbolçular eyforiyaya qapıldılar.

Klubun ciddi problemləri var. Məşq etməyə meydançaları yoxdur. Belə sistemsizliklə “Araz-Naxçıvan”ın avrokuboka gəlməsi, hətta “Aris”i keçməsi möcüzə idi”, ‒ deyə o qeyd edib.