"Atletiko" və "Roma"dan qələbə, "Yuventus"dan növbəti xal itkisi

La liqada çempionluğa iddialı “Atletiko” 8-ci turda çətinliklə qalib gəlib.

“Kadis”i qəbul edən Madrid klubu 27-ci dəqiqəyədək 2 dəfə matça mərkəzdən başlamalı olub. Qonaqlardan Pires və Martinin zərbələri dəqiq alınıb.

Fasiləyədək toplardan birinin əvəzini çıxan meydan sahibləri 2-ci yarıda daha 2 qol vurublar. Dubl edən Korrea ilə yanaşı, Molina fərqlənib. 3-2 hesablı qələbədən sonra 16 xalı olan “Atletiko” 4-cü pillədə qərarlaşıb. Komanda lider “Real”dan 5 xal geri qalır.

Mövsümün startında qeyri-sabit nəticələrə imza atan “Roma” İtaliya çempionatının 7-ci turunda “Frozione”dən güclü olub. “Canavarlar”ın heyətində Lukaku və Pelleqreni qapını dəqiq nişan alıb. “Roma” – “Frozinone”: 2-0.

Turun digər görüşündə “Yuventus” komandası “Atalanta”nın qonağı olub. 90 dəqiqə ərzində tərəflərin fərqlənmək imkanları olsa da, oyun qolsuz bərabərliklə yekunlaşıb. Bu nəticələrdən sonra A Seriyasına hərəyə 18 xalı olan “İnter” və “Milan” başçılıq edir. 4 xal az toplayan “Napoli” və “Yuventus” 3-cü, 4-cü yerləri bölüşdürürlər. 8 xalı olan “Roma” isə 12-cidir.