"Barselona" La Liqada böyük hesabla uduzdu

La liqanın 16-cı turunda mərkəzi görüş “Barselona” və “Jirona” klubları arasında olub.

Kataloniya kollektivlərinin matçında hesabı 12-ci dəqiqədə qonaqlar açıblar. Artyom Dovbik “Jirona”nı irəli çıxarıb. “Blauqrana”nın cavabı cəmi 7 dəqiqə sonra gəlib. Robert Levandovski tarazlığı bərpa edib. 1-1. Bununla belə fasiləyədək “Jirona” yenidən irəli çıxıb.

Migel Qutyerrez qapını dəqiq nişan alıb. 80-ci dəqiqədə Valeri “Barsa”nı 3-cü dəfə məyus edib. Meydan sahibləri artırılan dəqiqələrdə İlkay Gündoğanın qolu ilə fərqi azaltsalar da, çox keçmədən 4-cü dəfə oyuna mərkəzdən başlamalı olublar. Kristian Stuani qarşılaşmada son nöqtəni qoyub. “Barselona” – “Jirona”: 2-4.

Bu qələbə sayəsində xallarının sayını 41-ə çatdıran “Jirona” “Real”ı qabaqlayaraq liderliyə yüksəlib. 34 xalı olan “Barsa” isə “Atletiko” ilə 3-cü, 4-cü yerləri bölüşdürür.