"Liverpul" klubunun yaydığı məlumat futbol aləmini sarsıtdı

“Liverpul” komandasının baş məşqçisi Yurgen Klopp mövsümün sonunda tutduğu postu tərk edəcək.

Mersisayd təmsilçisindən verilən rəsmi məlumata görə, almaniyalı mütəxəssis klubun sahibləri ilə görüşərək yayda kollektivdən ayrılacağını bildirib. Qərarı barədə açıqlama verən Klopp “Liverpul” klubunu və şəhərini çox sevdiyini, lakin işinə davam etmək üçün enerjisinin tükəndiyini və bu fikrin onda çoxdan yarandığını deyib.

Qeyd edək ki, “Liverpul”un son illərdə əldə etdiyi uğurlar məhz Yurgen Kloppla bağlıdır. 2015-ci ildən komandanın sükanı arxasında olan 56 yaşlı mütəxəssisin rəhbərliyi ilə 2020-ci ildə İngiltərə Premyer liqasında çempion olan “qırmızılar”, 2019-cu ildə Çempionlar liqası, UEFA superkuboku və klublararası dünya çempionatı qələbə qazanıb. Bundan başqa, kollektiv 2022-ci ildə İngiltərə kuboku və Liqa kuboku yarışlarında qalib gəlib.