"Liverpul", "Mançester Yunayted" və "Real"ın növbəti oyunları

İngiltərə Premyer liqasında 17-ci turun mərkəzi matçı “Tottenhem” və “Liverpul” arasında olub.

Londonda keçirilən görüşdə 9 qol vurulub. İlk hissədə Luis Diaz, Aleksis Makalister və Dominik Soboslainin toplarına “mahmızlar” Ceyms Medisonun dəqiq zərbəsi ilə cavab veriblər.

2-ci yarıda L.Diazla yanaşı, “qırmızılar”ın liderlərindən Məhəmməd Salah dubl edib. Şimali London klubundan isə Deyan Kuluşevski və yenə Solanke fərqləniblər.

6-3 hesablı qələbədən sonra 39 xalı olan “Liverpul” 2-ci yerdəki “Çelsi”ni 4 xal qabaqlayaraq çempionatda liderliyini davam etdirir.

Mersisaydlıların əzəli rəqibi “Mançester Yunayted” isə bu tur öz meydanında ağır məğlubiyyətlə üzləşib. “Bornmut”u qəbul edən “qırmızı şeytanlar” 0-3 hesabı ilə uduzub.

Qonaqların qollarını Din Höysen, Castin Klüyvert və Antuan Semenyo vurublar. Bu nəticədən sonra “Bornmut” 5-ci, “Yunayted” isə 13-cü pillədədir.

La Liqada 18-ci turun diqqət mərkəzində olan oyunlarından biri son çempion “Real” və “Sevilya” arasında olub. “Santyaqo Bernabeu” arenasındakı matç “kral klubu”nun 4-2 hesablı qələbəsi ilə yekunlaşıb. “Los blankos”un heyətində Kilian Mbappe, Federiko Valverde, Rodriqo və Braim Dias fərqləniblər.

Bu qalibiyyətlə xallarının sayını 40-a çatdıran “Real” “Barselona”nı qabaqlayaraq 2-ci pilləyə qalxıb. Paytaxt komandası lider “Atletiko”dan 1 xal geri qalır.