"Liverpul" və "Real Madrid"dən inamlı qələbə

İngiltərə Premyer liqasının 3-cü turu əzəli rəqiblər “Mançester Yunayted” və “Liverpul” arasında matçla əlamətdar olub.

“Old Trafford” arenasında keçirilən görüşdə “qırmızılar” rəqibini böyük hesabla məğlub edib. 3 cavabsız topla qalib gələn mersisaydlılardan Luis Diaz dublla yadda qalıb. Digər qol Məhəmməd Salahın aktivindədir. Qələbə sayəsində 9 xalı olan “Liverpul” “Mançester Siti” ilə 1-ci, 2-ci yerləri bölüşdürür. 3 turdan sonra 3 xal toplayan “qırmızı şeytanlar” isə 14-cüdür.

Turun digər maraqlı oyunu “Sent-Ceyms Park” stadionunda baş tutub. “Nyukasl” və “Tottenhem”in matçında azarkeşlər 3 qol görüblər. “Sağsağanlar”dan Harvi Barns və Aleksandr İsak fərqləniblər. Daha bir epizodda meydan sahiblərinin üzvü Den Börn avtoqol müəllifi olub. “Nyukasl” – “Tottenhem”: 2-1.

La Liqada yeni mövsümə xal itkiləri ilə başlayan son çempion “Real Madrid” 4-cü turda “Betis”i qəbul edib. “Santyaqo Bernabeu” arenasında təşkil olunan qarşılaşmada Kilian Mbappe dubla imza atıb. Əvvəlcə 67-ci dəqiqədə Valverdenin ötürməsindən sonra İspaniya çempionatında ilk qolunu vuran forvard bir qədər sonra 11 metrlik cərimə zərbəsini səhvsiz yerinə yetirib. Görüşdə 2-0 hesablı qələbə qazanan “kral klubu” 2-ci pilləyə qalxıb. “Los blankos” lider “Barselona”dan 4 xal geri qalır.