"Neftçi" 35-ci turda "Səbail"in qonağı olub

Azərbaycan Premyer Liqasının 35-ci turunda daha bir oyun keçirilib.

Avrokuboklar uğrunda mübarizə aparan “Neftçi” kollektivi “Səbail”lə üz-üzə gəlib. “Asko Arena”da keçirilən görüş “ağ-qaralar”ın 3-0 hesablı qələbəsi ilə bitib.

Maraqlıdır ki, oyunun ilk hissəsində qapılar önündə qol vəziyyətləri yaransa da, hesab açılmayıb. İkinci yarıda paytaxt təmsilçisi ilk topu meydan sahiblərinin qapısından keçirib. 69-cu dəqiqədə Brayan Moreno möhtəşəm qolla azarkeşlərini sevindirib. 77-ci dəqiqədə Ataa Caber fərqi ikiyə çatdırıb. Görüşdə son nöqtəni 82-ci dəqiqədə Qara Qarayev qoyub. “Səbail” – “Neftçi”: 0-3.

Qeyd edək ki, bu qələbə sayəsində xallarının sayını 56-ya çatdıran “Neftçi” turnir cədvəlinin ikinci pilləsində qərarlaşıb. “Ağ-qaralar” çempionatın sonuncu turunda “Sabah”ın qonağı olacaq.