"Neftçi"nin kapitanı Emin Mahmudovdan tarixi uğur

“Neftçi” klubunun və Azərbaycan millisinin üzvü Emin Mahmudov yığma forması ilə tarixi uğura imza atıb.

Qazaxıstan seçməsi ilə yoxlama matçında fərqlənən 32 yaşlı yarımmüdafiəçi millinin qol rekorduna şərik olub.

Görüşün 52-ci dəqiqəsində penaltini dəqiq yerinə yetirən Emin yığmada qollarının sayını 14-ə çatdırıb. Bununla da, “Neftçi”nin kapitanı futbolumuzun əfsanəsi Qurban Qurbanovun rekordunu təkrarlayıb.

Qeyd edək ki, Emin Mahmudov 2016-cı ildən yığmamızın üzvüdür. Heyətin ən təcrübəli üzvlərindən olan futbolçu ümumən 50 matçda iştirak edib.