"Qızıl Top" mükafatına əsas namizədlərin adları məlumdur

Dünyaca məşhur “Goal” portalı öz versiyasına görə “Qızıl top”a namizədlərin adlarını açıqlayıb.

20 futbolçunun olduğu siyahıya ötən yay 103 milyon avroya “Real”a qoşulduqdan sonra parlaq oyun nümayiş etdirən Cud Bellingem başçılıq edir. 16 qolla La Liqanın bombardirlər yarışında lider olan Cud ümumən bütün yarışlarda 29 matçda 20 topun müəllifidir.

“Qızıl top”a namizədlər arasında 2-ci yerdə Kilian Mbappedir. “Real”a keçidi gündəmdə olan fransalı dünya çempionu mövsümün geridə qalan hissəsində 29 görüşdə 30 qolla yadda qalıb.

Siyahının 3-cü pilləsində isə Erlinq Holand qərarlaşıb. Ötən mövsüm “Siti”nin uğurlarında vacib rol oynayan norveçli forvard bir müddət əvvəl zədəsini sağaltsa da, bu mövsüm 26 oyunda 21 qol vurub.

Bundan başqa, “Qızıl top”a namizədlər arasında Harri Keyn, Məhəmməd Salah, Vinisius Junior və Floryan Virts kimi məşhur futbolçuların adları var. Maraqlıdır ki, “Goal” portalı siyahıda futbol əfsanələri Lionel Messi və Kriştiano Ronaldoya da yer verib. Portuqaliyalı ulduz reytinqdə 17-ci, Leo isə 20-ci pillədə qərarlaşıb.