"Qızıl Top" mükafatının yeni sahibi məlum oldu

Futbol aləminin ən nüfuzlu fərdi mükafatlarından, “Frans Futbol” jurnalının təsis etdiyi “Qızıl top”un sahibi müəyyənləşib. Bununla əlaqədar Parisin “Şatle” teatrında xüsusi tədbir təşkil olunub.

Jurnalistlər arasında səsverməyə əsasən, 2022/2023-cü illər mövsümünün yekununa görə, Lionel Messi mükafatın sahibi elan olunub. Bununla da 36 yaşlı veteran karyerasında 8-ci dəfə “Qızıl top”a layiq görülüb.

Qeyd edək ki, “Şatle” teatrında baş tutan tədbirdə digər nominasiyalarda da qaliblər müəyyənləşib. Ötən mövsüm bütün yarışlarda 53 oyunda 52 qol vuran, “Mançester Siti” ilə Premyer liqa, Çempionlar liqası və FA kubokunu qazanan Erlinq Holand ən yaxşı hücumçu elan olunub. 23 yaşlı forvarda “Herd Müller” mükafatı təqdim edilib.

Bu yay “Real”a keçidindən sonra əla formada olan və meydana çıxdığı 13 görüşdə 13 qolla yadda qalan Cud Bellingem ən yaxşı gənc futbolçu kimi “Raymon Kopa” mükafatına layiq görülüb. Barselonanın qadınlardan ibarət komandasının üzvü Aytana Bonmati isə “ən yaxşı qadın futbolçu” adına yiyələnib.