"Real Madrid" "Qızıl top"un qalibini transfer etmək istəyir

“Qızıl top” mükafatının son qalibi Rodri komandasını dəyişmək niyyətindədir.

28 yaşlı futbolçu karyerasını “Real Madrid”də davam etdirmək istəyir. “Kral klubu” bu keçid üçün dayaq yarımmüdafiəçisi Orelyen Çuameni ilə vidalaşmağa hazırdır. “Los blankos” 80 milyon avroya transfer etdiyi oyunçu üçün gələn təkliflərə açıqdır.

Digər tərəfdən Rodrinin hazırkı klubu “Mançester Siti” onun getməsinin əleyhinədir. “Şəhərlilər” müqaviləsi 2027-ci ilədək olan futbolçuya daha yaxşı şərtlərlə yeni sözləşmə təklif edəcək.

Qeyd edək ki, “Mançester Siti”nin 2019-cu ildə “Atletiko”dan 70 milyon avroya transfer etdiyi Rodri bütün yarışlarda 260 görüşə çıxıb. 26 qol və 30 məhsuldar ötürmə ilə yadda qalan oyunçu 4 dəfə İngiltərə çempionu olub. “İnter”lə Çempionlar liqası finalında “Siti”nin yeganə qolunu vuraraq komandasına mükafatı qazandıran futbolçu İngiltərə Liqa kuboku, FA kuboku və İngiltərə superkubokunda da qalib gəlib. Təcrübəli yarımmüdafiəçi İspaniya millisinin AVRO-2024-də çempion olmasında da vacib rol oynayıb.