"Yuventus", PSJ və "Monako"nun növbəti matçları

Çempionlar liqasının 3-cü turunda gözlənilməz nəticələrdən biri İtaliyada qeydə alınıb.

“Alyans Stedium”da Almaniyanın “Ştutqart” klubu ilə üz-üzə gələn “Yuventus” azarkeşlərini məyus edib. 84-cü dəqiqədə Danilonun qırmızı vərəqə almasından sonra təzyiqi artıran “Ştutqart” matçın sonlarında El Bilal Turenin qolu ilə “Qoca Sinyora”nı məğlub edib.

Niderland çempionu PSV-ni qəbul edən “Pari Sen-Jermen” turu xal itkisi ilə tamamlayıb. “Park de Prens”dəki oyunun 1-ci hissəsi Lanqın qolu sayəsində qonaqların xeyirinə bitsə də, 55-ci dəqiqədə Əşrəf Hakiminin dəqiq zərbəsi parisliləri məğlubiyyətdən xilas edib. PSJ – PSV: 1-1.

Yarışa uğurla başlayan “Aston Villa” ardıcıl 3-cü qələbəsini qazanıb. Öz meydanında “Bolonya” ilə qarşılaşan Birmingem klubu Con Makqin və Con Duranın qolları ilə 2-0 hesabı ilə qalib gəlib.

Bu tur həm də yarışın debütantı “Jirona”nın ilk qələbəsi ilə əlamətdar olub. “Slovan Bratislava”nı qəbul edən İspaniya kollektivi 3 xalı 2 cavabsız topla aktivinə yazıb.

Gecənin ən bol qollu oyunlarından biri isə “Monako” və “Srvena Zvezda” arasında baş tutub. Serbiya çempionuna rəhm etməyən knyazlıq təmsilçisi görüşdən 5-1 hesablı inamlı qələbə ilə ayrılıb.