Ronaldo millinin heyətində 200-cü matçını qolla qeyd etdi

AVRO 2024-ün seçmə mərhələsinin 4-cü turu çərçivəsində İslandiya yığması Portuqaliya millisini qəbul edib.

Qarşılaşma Kriştiano Ronaldonun qolu sayəsində qonaqların 1-0 hesablı qələbəsi ilə yekunlaşıb. Bu top portuqaliyalı ulduz üçün əlamətdar olub. Belə ki, milli komandalar səviyyəsində 200 oyun göstəricisinə çatan ilk futbolçu olan Kriştiano 123-cü qoluna imza atıb.

Qeyd edək ki, 4-cü turu qalibiyyətlə tamamlayan Portuqaliya komandası 12 xalla J qrupunun lideridir. Ardıcıl 2-ci görüşdə uduzan İslandiya seçməsi isə 3 xalla 5-cidir. Yığmamızın da yer aldığı F qrupunda mübarizə aparan Estoniya və Belçika millilərinin matçı da maraqlı alınıb. Tallində keçirilən qarşılaşmada belçikalılar 3-0 hesabı ilə güclü olublar.

Komandanın qələbəsində dubl edən Romelu Lukaku önəmli rol oynayıb. Daha 1 epizodda isə Yohan Bakayoko fərqlənib. 3 görüşdən sonra 7 xal toplayan Belçika yığması F qrupunda 2-ci pillədə qərarlaşıb. Cəmi 1 xalı olan Estoniya seçməsi isə 4-cüdür.