Sərbəst güləş millimiz Avropa çempionu oldu

Sərbəst güləş üzrə yığmamız ardıcıl 2-ci dəfə Avropa çempionu olub.

Komandamız Xorvatiyada təşkil olunan turniri 6 medalla tamamlayıb. Pəhləvanlarımızdan 3 qat dünya dünya çempionu, 70 kq çəkidə çıxış edən Hacı Əliyev finalda bolqarıstanlı Ramazan Ramazanovu məğlub edərək 4-cü dəfə qitənin ən güclüsü olub.

Daha bir qızıl medalı Əliabbas Rzazadə qazanıb. 57 kq-da qüvvəsini sınayan idmançımız həlledici görüşdə türkiyəli Süleyman Atlıya qalib gəlib.

Bundan başqa, Osman Nurmaqomedov və Maqomedxan Maqomedov da finala yüksəlsələr də, burada uduzaraq gümüş mükafatın sahibi olublar. Abubakr Abakarov və Georgi Meşvildişvili isə bürünc medala yiyələniblər.

Beləliklə, 2 qızıl, 2 gümüş və 2 bürünc mükafat qazanaraq 150 xal toplayan sərbəst güləş millimiz ardıcıl 2-ci, ümumilikdə isə 4-cü dəfə Avropa çempionu olub.