“Trabzonspor” “Arsenal”ın məşhur futbolçusunu heyətinə qatıb

Türkiyənin məşhur komandalarından “Trabzonspor” klubu “Arsenal”ın hücumçusu Nikolya Pepeni heyətinə qatıb.

Bu barədə Qara dəniz təmsilçisinin sosial media hesablarında məlumat verilib. Kotdivuarlı vingerin müqaviləsinin detalları isə hələ açıqlanmayıb.

Qeyd edək ki, 28 yaşlı Pepe 2019-cu ildən “Arsenal”ın şərəfini qoruyurdu. 80 milyon avroya “Lill”dən keçən Nikolya “topçular”ın forması ilə 112 matçda 27 qolla yadda qalıb. Ötən mövsümü icarə əsasında Fransanın “Nitsa” klubunda keçirən oyunçu 28 görüşdə 8 qol vurub.

Əlavə edək ki, “Arsenal”da çıxış etdiyi müddətdə FA kubokunu qazanan Nikolya 2016-cı ildən Kotdivuar millisinə də çağırılır. Yığma forması ilə 37 oyun keçirən forvard 10 dəfə rəqib qapılarına yol tapıb.