Türkiyə və ABŞ-nin ölkəmizdəki səfirlikləri Hidayət Heydərovu təbrik edib

Türkiyənin ölkəmizdəki səfirliyi Olimpiya çempionu Hidayət Heydərovu təbrik edib.

Bununla əlaqədar səfirliyin rəsmi “X” hesabında post yerləşdirilib.

Paylaşımda “Olimpiadanın cüdo yarışında qızıl medal qazanaraq, Azərbaycan bayrağını Fransada dalğalandıran Hidayət Heydərovu ürəkdən təbrik edirik” sözləri yazılıb.

ABŞ-nin ölkəmizdəki səfirliyi də Olimpiya çempionumuzla bağlı post hazırlayıb.

“Hidayət Heydərovu qızıl medal qazanması münasibətilə təbrik edirik! Fədakarlıq və zəhmət həqiqətən öz bəhrəsini verdi. Bu möhtəşəm nailiyyətdən zövq alın. Bu sizin istedadınızın və əzmkarlığınızın sübutudur. Azərbaycan komandasını da bu qələbə ilə təbrik edirik. Qarşıda daha çox uğurlar və qızıl medallar ümidi ilə!”, – deyə paylaşımda qeyd olunub.

Xatırladaq ki, 73 kq çəkidə yarışan cüdoçumuz Hidayət Heydərov Fransanın paytaxtında keçirilən turnirdə İsrail, Kanada, Kosovo və Fransa təmsilçilərinə qalib gələrək fəxri kürsünün ən yüksək pilləsinə qalxıb.