Türkiyə yığması Almaniya seçməsinə qalib gəldi

AVRO-2024-ün final mərhələsinə vəsiqəni vaxtından əvvəl təmin edən Türkiyə millisi Almaniya yığması ilə yoldaşlıq oyunu keçirib.

“Ay-ulduzlular” Berlində 2:3 hesablı qələbə qazanıblar. Matçda ilk qol 5-ci dəqiqədə vurulub. Kay Havertz fərqlənib. Fərdi Kadıoğlu 38-ci dəqiqədə tarazlığı bərpa edib. Fasilə ərəfəsində Kənan Yıldız 2-ci topu almaniyalıların qapısından keçirib.

Türkiyə yığması fasiləyə üstün yollanıb. 49-cu dəqiqədə hesab yenidən bərabərləşib. Nikla Fullkriq hədəfi dəqiq nişan alıb. Oyunda son nöqtəni Yusuf Sarı qoyub. Almaniya-Türkiyə: 2-3.