UEFA Çempionlar liqasında 1-ci tura start verilib

UEFA Çempionlar liqasında Liqa mərhələsinin I turuna start verilib.

Gecənin maraqlı oyunlarından biri İtaliyada “Milan” və “Liverpul” arasında olub.

“San-Siro” stadionunda keçirilən və 4 qolun vurulduğu matçda qələbəni mersisaydlılar bayram edib. İngiltərə klubundan İbraima Konate, Vircil van Deyk və Dominik Soboslainin qollarına meydan sahibləri Kristian Pulişiçin yeganə topu ilə cavab veriblər. “Milan” – “Liverpul”: 1-3.

Eyni hesab yarışın son qalibi “Real Madrid” və “Ştutqart” arasında görüşdə də qeydə alınıb. “Santyaqo Bernabeu” arenasındakı qarşılaşmada “kral klubu” Kilian Mbappenin qolu ilə önə çıxsa da, Deniz Undav tarazlığı bərpa edə bilib. Lakin təzyiqi artıran “los blankos” Antonio Rüdiger və Endrikin qolları ilə yekunda qələbəni təmin edib.

“Alyans Stedium”da PSV-ni qəbul edən “Yuventus” da 3-1 hesablı qalibiyyətə sevinib. Turin təmsilçisinin heyətində fasiləyədək Kənan Yıldız və Ueston Makkenni, 2-ci yarıda isə Niko Qonsales fərqləniblər. Niderland komandasının yeganə topu İsmael Saybarinin aktivindədir.

Gecənin ən məhsuldar oyunu Münhendə “Bavariya” və Zaqreb “Dinamo”su arasında olub. 11 qolun vurulduğu matçda “rekordmayster”dən Harri Keyn 4 dəqiq zərbə ilə pokerə imza atıb.

Onunla yanaşı, Rafael Qerreyru, Maykl Olise, Leroy Sane və Leon Qoretska rəqibin qapısına yol tapıblar. Xorvatiya çempionunun gücü ancaq 2 qola çatıb. “Bavariya” – “Dinamo”: 9-2.

Unai Emerinin çalışdırdığı “Aston Villa” da yarışa qələbə ilə başlayıb. İsveçrənin “Yanq Boyz” klubunun qonağı olan birmingemlilər 3 cavabsız topla qalib gəliblər. İngiltərə təmsilçisinin qolları Yuri Tilemans, Ceykob Remzi və Amadu Onananın aktivindədir.

Qeyd edək ki, Liqa mərhələsinin ilk turuna sentyabrın 19-u yekun vurulacaq.