UEFA Çempionlar Liqasında 5-ci tura yekun vurulub

UEFA Çempionlar liqasında V tura yekun vurulub.

Gecənin mərkəzi görüşündə “Liverpul” və “Real Madrid” klubları üz-üzə gəliblər.

“Enfild” arenasında keçirilən matç “qırmızılar”ın 2-0 hesablı qələbəsi ilə bitib.

Qarşılaşmada hesabı 52-ci dəqiqədə Aleksis Makkalister açıb. 61-ci dəqiqədə “kral klubu” tarazlığı bərpa etmək üçün imkan qazansa da, Kilian Mbappe penaltidən fərqlənə bilməyib. 76-cı dəqiqədə isə Kodi Qakpo 2-ci topu “Real”ın qapısından keçirib.

Zaqrebdə “Dinamo”nun qonağı olan ötən mövsümün finalçısı “Borussiya Dortmund” inamlı qələbəyə sevinib. “Maksimir” stadionunda baş tutan qarşılaşmada Almaniya klubu 3-0 hesabı ilə güclü olub. Komandanın qollarını Qittens, Bensebaini və Qirassi vurublar.

Gecənin məhsuldar görüşlərindən biri “Monako” və “Benfika” arasında olub. 5 qolun qeydə alındığı matçın ilk hissəsi knyazlıq klubunun 1-0 hesablı üstünlüyü ilə yekunlaşsa da, fasilədən sonra dönüş edən “Benfika” 3-2 hesablı qələbə qazanıb.

Bu nəticələrdən sonra Liqa mərhələsinin yarış cədvəlinə 15 xalı olan “Liverpul” başçılıq edir. 2 xal az toplayan “İnter” isə 2-ci yerdədir.