Yunan-Roma güləşçilərimizdən Dünya çempionatında tarixi uğur | Albaniya

Azərbaycanın yunan-Roma güləşçiləri dünya çempionatında tarixi uğura imza atıblar.

Albaniyanın paytaxtı Tiranada keçirilən yarışda eyni gündə 3 pəhləvanımız qızıl medal qazanıb.

İdmançılarımızdan 55 kq çəki dərəcəsində mübarizə aparan Eldəniz Əzizli finalda iranlı Poya Marz ilə üz-üzə gəlib. Görüş 1-1 hesabı ilə başa çatsa da, xalların keyfiyyətinə görə qalib gələn E.Əzizli karyerasında 4-cü dəfə dünya çempionatının qızıl medalına yiyələnib.

Digər güləşçimiz 63 kq çəkidə qüvvəsini sınayan Nihat Məmmədli həlledici mərhələdə qazaxıstanlı Yerjet Jarlikassini 6-1 hesabı ilə məğlub edərək fəxri kürsünün ən yüksək pilləsinə qalxıb.

Daha bir idmançımız 72 kq çəki dərəcəsində mübarizə aparan Ülvü Qənizadə isə finalda fransalı İbrahim Qanemdən 3-2 hesabı ilə üstün olub və 3-cü qızıl medalı ölkəmizin aktivinə yazdırıb.

Titulunu qoruyan komandamız ardıcıl 2-ci dəfə bu uğura imza atıb. Ölkəmiz ən yaxın izləyicisi İranı 34 xal qabaqlayıb. Millimiz bu nəticə ilə Azərbaycan güləşində birdən-birə 2 rekordu yeniləyib. Eyni zamanda yunan-Roma yığmamız turnirdə 3 qızıl medal qazanmaqla ilkə imza atıb.