2024-cü il üzrə iqtisadi göstəricilər | Sahibə Qafarova valyuta ehtiyatlarından danışdı

“Ötən il ümumi daxili məhsul 4,1 faiz artaraq 126 milyard manat təşkil edib. Valyuta ehtiyatlarımız isə il ərzində 5 milyard dollardan çox artaraq 72 milyard dollara çatıb”.

Bunu Milli Məclisin sədri Sahibə Qafarova parlamentin bugünkü plenar iclasında Nazirlər Kabinetinin 2024-cü ildəki fəaliyyəti haqqında hesabatı ilə bağlı danışarkən deyib.

S.Qafarova əlavə edib ki, ötən il ümumi daxili məhsulun artımı həm neft, həm də qeyri neft-qaz sahələri hesabına əldə edilib:

“İqtisadiyyatın şaxələndirilməsi, xüsusilə də nəqliyyat-tranzit potensialının reallaşdırılması, kənd təsərrüfatının, turizmin, rəqəmsal və yaşıl iqtisadiyyatın inkişaf etdirilməsi istiqamətində mühüm tədbirlər görülür. Hökumətin bu istiqamətdə gördüyü işlər iqtisadiyyatın dayanıqlı olmasına xidmət edir”.

Sədr bildirib ki, Böyük Qayıdış, işğaldan azad edilmiş ərazilərin yenidən qurulması və bərpası üçün 2024-cü ildə büdcədən 5,4 milyard manata yaxın vəsait ayrılıb, il ərzində 5500-ə yaxın insanın doğma yurdlarına köçürülməsi təmin edilib.