2025-ci il üçün dövlət büdcəsinin proqnozlaşdırılan gəlir və xərcləri artırılacaq

2025-ci ilin dövlət büdcəsinin proqnozlaşdırılan gəlir və xərcləri artırılıb.

“Trend”in məlumatına görə, Milli Məclisin birinci və ikinci oxunuşda qəbul etdiyi layihəyə əsasən, 2025-ci ildə dövlət büdcəsinin gəlirləri 38 milyard 316 milyon manat, xərcləri isə 41 milyard 367,6 milyon manat nəzərdə tutulmuşdu.

Parlamentdə dekabrın 16-da üçüncü oxunuşda müzakirəyə çıxarılacaq layihəyə görə isə büdcənin gəlirləri 38 milyard 356 milyon manat, xərcləri isə 41 milyard 407,6 milyon manat olacaq.

Bununla da gəlir və xərcləri 40 milyon manat artırılır. Gəlirlərin artımı büdcə təşkilatlarının ödənişli xidmətlərindən daxilolmaların hesabına olacaq.

Belə ki, Milli Məclisin birinci və ikinci oxunuşda qəbul etdiyi qanun layihəsinə əsasən, büdcə təşkilatlarının ödənişli xidmətlərindən daxilolmalar 840 milyon manat proqnozlaşdırılmışdı. Lakin üçüncü oxunuşda bu mənbə üzrə proqnozlaşdırılan gəlir 880 milyon manata qaldırılıb.

Qeyd edək ki, maliyyə naziri Samir Şərifov 2025-ci ilin dövlət büdcəsinin müzakirəsi zamanı bildirib ki, büdcə təşkilatlarının ödənişli xidmətlərindən dövlət büdcəsinə daxilolmaların əksər hissəsini cərimələr təşkil edir.