ABŞ şirkətləri Azərbaycanda fəaliyyətini genişləndirməyə hazırdır - Baku TV

ABŞ şirkətləri Azərbaycanın neft-qaz sektorunda öz rollarını genişləndirmək imkanlarını araşdırmağa davam edir.

“Trend”in məlumatına görə, bunu ABŞ Dövlət katibinin iqtisadi, enerji və işgüzar məsələlərlə bağlı köməkçisi Kaleb Orr bildirib.

Kaleb Orrun sözlərinə görə, Azərbaycanın neft-qaz sektoru artıq işlənmiş Xəzər yataqlarında hasilatın maksimuma çatdırılmasına, eləcə də daxili istehlak və ixrac üçün quruda və şelfdə yeni neft və qaz mənbələrinin axtarışı, eləcə də işlənməsinə yönəlib.

Bu imkanlara 2025-ci ildə “ExxonMobil” ilə SOCAR arasında qeyri-ənənəvi qurudakı neft-qaz ehtiyatlarının tədqiqi, işlənməsi və hasilatı üzrə imzalanmış Anlaşma Memorandumu daxildir. Həmçinin ixrac neft və qaz kəmərlərinin ötürücülük qabiliyyətinin artırılması variantları nəzərdən keçirilir.

Qeyd edək ki, Azərbaycan Hökuməti ilə Amerika Birləşmiş Ştatları Hökuməti arasında Strateji Tərəfdaşlıq haqqında Xartiyanın mətnində Azərbaycanın regionun enerji təhlükəsizliyinin təmin olunmasında strateji rol oynadığı bildirilir.