“Ansys” və “AZEL Systems” Bakıda konfrans təşkil edib

Bakıda “Ansys: Rəqəmsal Mühəndislik və İnnovasiya Həlləri Azərbaycanda” adlı konfrans keçirilib.

Tədbir Azərbaycanın aparıcı sistem inteqratoru olan “AZEL Systems” və nəqliyyat, telekommunikasiya, aviasiya və enerji kimi sahələrdə layihələrin optimallaşdırılması, təhlükəsizliyin artırılması və innovasiyaların təşviqi üçün istifadə olunan mühəndislik simulyasiya proqram təminatının qlobal təchizatçısı – ABŞ-nin “Ansys” şirkəti ilə əməkdaşlığı çərçivəsində təşkil edilib.

“AZEL Systems” şirkətinin baş direktoru İqor Yakovenko bildirib ki, şirkət informasiya texnologiyaları və rəqəmsallaşma texnologiyalarının tətbiqi üzrə ixtisaslaşıb. O, xərclərə daha effektiv nəzarətin təmin edilməsi üçün yalnız lisenziyalı proqram təminatından istifadənin vacibliyini qeyd edib.

Daha sonra “Ansys, part of Synopsys” şirkətinin vitse-prezidenti Cim Çiamardas müxtəlif sənaye sahələri üzrə şirkətin həlləri barədə qısa icmal təqdim edib.

Təqdimatlar iştirakçılar tərəfindən böyük maraqla qarşılanıb. Tədbir Azərbaycanda dayanıqlı sənaye inkişafının dəstəklənməsində rəqəmsal mühəndislik və simulyasiya texnologiyalarının artan rolunu bir daha təsdiqləyib.