Azərbaycan Aİ ölkələri üçün hər zaman etibarlı tərəfdaş olub | Ceyhun Bayramov

“Azərbaycan üçün Avropa İttifaqı əsas ticarət tərəfdaşıdır”.

Bunu Azərbaycan Respublikasının xarici işlər naziri Ceyhun Bayramov Avropa İttifaqının xarici işlər və təhlükəsizlik siyasəti üzrə ali nümayəndəsi, Avropa Komissiyasının vitse-prezidenti Kaya Kallas ilə birgə mətbuat konfransı zamanı deyib.

“2024-cü ilin yekunlarına əsasən, bizim ticarət dövriyyəmiz təxminən 20 milyard ABŞ dolları təşkil edib”, ‒ nazir bildirib.

C.Bayramovun sözlərinə görə, Azərbaycan uzun illər ərzində Avropa İttifaqı üçün bir sıra istiqamətlər üzrə etibarlı və hər zaman proqnozlaşdırıla bilən bir tərəfdaş olub:

“Bunların sırasında biz ilk olaraq enerji əməkdaşlığını qeyd edə bilərik. Uzun illər ərzində Azərbaycan Avropa İttifaqı ölkələri üçün etibarlı xam neft təchizatçısı olub. Daha sonra Cənub Qaz Dəhlizinin ikinci fazasının yekunlaşdırılması ‒ Trans-Adriatik Boru Kəmərinin tikintisinin başa çatdırılması ilə 2020-ci ilin sonlarından başlayaraq ilk dəfə olaraq Xəzər bölgəsindən Avropa ölkələrinə qaz təchizatına start verilib”.