Azərbaycan Türk Dövlətləri Qiymətləndiricilər Birlikləri Şurasına rəhbərlik edəcək

Bakıda 3-cü Beynəlxalq Qiymətləndiricilər Forumu keçirilib.

Forumu giriş nitqi ilə açan Azərbaycan Qiymətləndiricilər Cəmiyyətinin sədri Vüqar Oruc bildirib ki, ölkəmizdə assosiativ strukturların fəaliyyətinə geniş imkanlar yaradılıb.

Azərbaycanın maliyyə nazirinin müavini Azər Bayramov isə ölkəmizdə qiymətləndirmə sahəsində görülən işlərdən bəhs edib.

Tədbirin digər iştirakçıları da türk dövlətlərinin qarşılıqlı fəaliyyətindən və bu sahədəki perspektivlərdən danışıblar.

Forumda, Türkiyə, Qazaxıstan, Özbəkistan, Qırğızıstan, Türkmənistan, Şimali Şipr Türk Cümhuriyyəti, Rusiya, Belarus və Gürcüstandan olan nümayəndələrin də çıxışları dinlənilib.

Tədbirin panel mərhələsində isə “Qiymətləndirici peşəsinin inkişafı - beynəlxalq və regional perspektivlər”, “Ortaq Türk qiymətləndirmə standartları və qiymətləndirmə bazarı” mövzularında çıxışlar olub. Sonra mükafatlandırma mərasimi keçirilib.

Eyni zamanda ölkəmizin tarixi zəfərindən, türk dövlətləri arasında həmrəyliyin yeni mərhələsindən, Azərbaycan Qiymətləndiricilər Cəmiyyətinin və Türk Dövlətləri Qiymətləndiricilər Birlikləri Şurasının fəaliyyətindən bəhs edən videoçarx nümayiş olunub.