Azərbaycanda həyata keçiriləcək külək və günəş enerjisi layihələri | Memorandum barədə detallar

Hazırda “SOCAR Green” və “PowerChina” arasında qarşılıqlı anlaşma memorandumu çərçivəsində Azərbaycanda birgə həyata keçiriləcək günəş və külək enerjisi layihələrinin ilkin qiymətləndirilməsi aparılır.

Bu barədə “Trend”ə “SOCAR Green”dən məlumat verilib.

“Bu, strateji tərəfdaşlıq bərpa olunan enerji sahəsində bir sıra imkanların araşdırılmasına yönəlib. Buraya iri miqyaslı günəş fotovoltaik layihələri, quruda və dənizdə külək elektrik stansiyalarının tikintisi, eləcə də enerji saxlama sistemləri və inteqrasiya olunan ağıllı enerji sistemləri kimi infrastruktur layihələri daxildir. “SOCAR Green” və “PowerChina” bu layihələrin texniki-iqtisadi əsaslandırılmasını qiymətləndirmək üçün sıx əməkdaşlıq edir. Dəqiq investisiya rəqəmləri qiymətləndirmə prosesi irəlilədikcə müəyyən ediləcək”, – “SOCAR Green”dən bildirilib.

Qeyd edək ki, “SOCAR Green” və “PowerChina” COP29 çərçivəsində Azərbaycanda bərpa olunan enerji layihələrinin inkişafı üzrə birgə imkanların araşdırılması məqsədilə qarşılıqlı anlaşma memorandumu imzalayıb. Memorandum günəş və külək elektrik stansiyalarının inşası, inteqrasiya olunan ağıllı enerji sistemləri, yaşıl hidrogen istehsalı ilə bağlı layihələrin qiymətləndirilməsi və sərmayə qoyuluşunda birgə səyləri nəzərdə tutur.

“Həmçinin COP29 çərçivəsində əldə edilən daha bir əhəmiyyətli nailiyyəti qeyd etmək istərdik: “SOCAR Green” Azərbaycanın cənub bölgələrində potensial geotermal sistemlərin qiymətləndirilməsi üçün “Baker Hughes” ilə qarşılıqlı anlaşma memorandumu imzalayıb”, – deyə “SOCAR Green”dən bildirilib.