“SOCAR Green” karbon bazarının gələcək inkişaf istiqamətlərini dəyərləndirdi - Baku TV

Karbon kreditləri üzrə 30-40 illik gəlir proqnozları kreditorlar üçün ciddi qeyri-müəyyənlik yaradır.

“Report”un məlumatına görə, bunu “SOCAR Green” şirkətinin İnvestisiyalar və Layihələrin İnkişafı üzrə direktoru Rza Nağıyev bildirib.

Onun sözlərinə görə, dünyada bərpa olunan enerji layihələri üzrə qiymətin nisbətən sabit olduğu uzunmüddətli elektrik enerjisi alqı-satqısı müqavilələri imzalanır. Bu səbəbdən həm kreditorlar, həm də investorlar üçün risk nisbətən aşağı olur.

Lakin karbon kreditlərinə gəlincə, vəziyyət eyni deyil. Karbon bazarları hələ o qədər də formalaşmayıb. Burada uzunmüddətli karbon satışı müqavilələri nisbətən daha azdır və bu səbəbdən qeyri-müəyyənlik daha yüksəkdir.

Rza Nağıyevin fikrincə, müqavilələr olduqda belə kreditorlar karbon kreditlərinin uzunmüddətli satınalma müqavilələrinə bəzən arxalana bilmirlər. Buna səbəb qiymətlərin dəyişkən olması və bu sahənin hələ də inkişafının ilkin mərhələsində olmasıdır.