Azərbaycanın qlobal İslam maliyyəsi bazarına inteqrasiyasında sukukun rolu - Baku TV

Mərkəzi Bankın sədri Taleh Kazımov İslam İnkişaf Bankı Qrupunun 51-ci İllik Toplantısı çərçivəsində təşkil olunmuş “İslam Maliyyəsi üzrə 20-ci IsDB Qlobal Forumu”nda bildirib ki, Azərbaycanda ilk sukukun buraxılışına hazırlıq gedir.

Sədr qeyd edib ki, Mərkəzi Bank Azərbaycanda sukukun tətbiqi üçün əlverişli mühitin formalaşdırılması məqsədilə İslam İnkişaf Bankı ilə birgə layihə həyata keçirir.

Məlumat üçün bildirək ki, sukuk istiqrazların islam ekvivalentidir. Lakin istiqrazdan fərqli olaraq sukukda konkret faiz gəliri olmur. Sukuk, yəni islam istiqrazlarını buraxan tərəf alıcıya faiz deyil, layihədən əldə etdiyi real gəlirin bir hissəsini ödəyir. Yəni sukuku buraxan tərəf gəlirlə işləməsə, onun alıcısı gəlir əldə edə bilmir. Bu mənada, sukuk istiqraz və səhmin birgə forması sayılır. Sukukun alıcısı onu buraxan təşkilatın əmlakının sahiblərindən birinə çevrilir.

Bu xüsusiyyətləri nəzərə alanda Azərbaycanda sukukun tətbiqinin əhəmiyyəti nə ola bilər?

İqtisadçı Eyyub Kərimli hesab edir ki, sukuk bazarı uğurla formalaşdırılsa, ölkəmizin maliyyə mərkəzi kimi mövqeyi gücləndirilə bilər, həmçinin Körfəz ölkələrindən daha çox kapital cəlb edilər və xüsusilə də yaşıl enerji, logistika və infrastruktur layihələrinin maliyyələşdirilməsi üçün əlavə resurs əldə edilə bilər:

“Belə ki, bu, ölkənin qeyri-neft sektorunun maliyyələşməsi imkanlarına da ciddi təsir göstərəcək. Hesab edirəm ki, sukukun tətbiqi ölkəni qlobal islam maliyyəsi bazarına inteqrasiya edən strateji körpü rolunu oynayır. Bu addım xarici investisiyanın artırılmasına, maliyyə bazarlarının dərinləşdirilməsinə və iri infrastruktur layihələrinin daha əlverişli maliyyələşdirilməsinə imkan verə biləcək”.