Bakıda Xəzər və Mərkəzi Asiya üzrə neft ticarəti və logistika Forumu keçirilib - Baku TV

Türkiyə və Qafqaz ölkələri uzunmüddətli perspektivdə neft-kimya sənayesinin mühüm mərkəzinə çevrilə bilər.

Bu barədə "SOCAR Türkiye" şirkətinin müşaviri Mevlüt Çetinkaya Bakıda keçirilən II Xəzər və Mərkəzi Asiya neft ticarəti və logistikası forumunda bildirib.

Onun sözlərinə görə, enerji daşıyıcılarının qiymətlərinin artması Avropa istehsalçılarının vəziyyətini əhəmiyyətli dərəcədə pisləşdirib və onları ABŞ və Asiya ölkələri ilə müqayisədə daha az rəqabətədavamlı edib.

“Nəticədə bir sıra müəssisələr tədricən bazardan çıxır, investisiya fəallığı isə digər regionlara yönəlir. Eyni zamanda, qlobal neft-kimya sənayesi struktur transformasiya mərhələsindən keçir. Asiyada, xüsusilə Çində istehsal güclərinin sürətli artımı müşahidə olunur. Belə ki, əvvəllər milyonlarla ton polipropilen idxal edən ölkə bu gün artıq özü bu məhsulun ixracatçısına çevrilib”, – deyə şirkətin müşaviri bildirib.

M.Çetinkaya qeyd edib ki, 2027-ci ilə qədər Avropada etilen istehsal güclərinin təxminən 5 milyon ton azalacağı gözlənilir.

“Çin isə əksinə, demək olar ki, özünü tam təmin edən ölkəyə çevrilib. Əvvəllər milyonlarla ton polipropilen idxal etdiyi halda, indi artıq ixracatçıdır. Yeni trendlərdən biri neftin yanacağa deyil, birbaşa neft-kimya məhsullarına çevrilməsidir. Əvvəllər xammalın cəmi 15–20 faizi neft-kimya sektoruna yönəldilirdisə, indi bu göstərici 50 faizə qədər yüksəlir. 2035-ci ildə bu göstərici iki dəfə arta bilər”, – deyə M.Çetinkaya əlavə edib.