BƏƏ şirkətinin səhmdar olması Bakıya nə qazandırır? - Layihə barədə iqtisadçılardan şərh - Baku TV

Prezident İlham Əliyevin Birləşmiş Ərəb Əmirliklərinə səfəri çərçivəsində “Cənub Qaz Dəhlizi” Qapalı Səhmdar Cəmiyyətinin müəyyən hissəsinin Əbu-Dabi Milli Neft Şirkətinin investisiya qolu olan XRG şirkətinə satışı ilə bağlı alqı-satqı müqaviləsinə dair sənəd imzalanıb.

Alqı-satqı əməliyyatı İqtisadiyyat Nazirliyinə məxsus qeyri-nəzarət payı üzrə həyata keçirilib. Cəmiyyət “Cənub Qaz Dəhlizi”ndəki layihələr üzrə Azərbaycana məxsus payların konsolidasiya edilməsi, idarə olunması və maliyyələşdirilməsi məqsədilə 2014-cü ildə yaradılıb.

İqtisadçı Xalid Kərimli deyir ki, “Cənub Qaz Dəhlizi” QSC-nin bir hissəsinin satılmasının Azərbaycan üçün bir sıra istiqamətlərdə strateji əhəmiyyəti var:

“Bu layihə uzunmüddətli və yüksək kapitaltutumlu layihədir. Ümumiyyətlə, sözügedən layihənin genişləndirilməsi məsələləri də gündəlikdədir. Çünki 2022-ci ildə Avropa Komissiyasının sədrinin iştirakı ilə “Cənub Qaz Dəhlizi”nin ötürmə gücünün artırılması məsələsi ilə bağlı Memorandum imzalanıb. Amma tam olaraq icraata keçməyib”.

Ekspert hesab edir ki, prosesin həyata keçirilməsi maliyyə və risklərin bölüşdürülməsinə ehtiyac yaradır. Alqı-satqı həmçinin Azərbaycanla Birləşmiş Ərəb Əmirlikləri arasında strateji tərəfdaşlığın dərinləşməsinə xidmət edir.

Enerji məsələləri üzrə ekspert İlham Şaban bu sövdələşməni qlobal enerji təhlükəsizliyinin təmin edilməsində rəsmi Bakıya olan inamın ifadəsi kimi qiymətləndirir. O hesab edir ki, Birləşmiş Ərəb Əmirlikləri kimi böyük enerji oyunçusunun layihəyə qoşulması maliyyə dayanıqlığını gücləndirməklə yanaşı, layihənin beynəlxalq siyasi çəkisini də artırır.

Qeyd edək ki, “Cənub Qaz Dəhlizi” QSC-də nəzarət payı SOCAR-a aid olaraq qalır. Ümumi səhmlərin 51 faizi Dövlət Neft Şirkətinə məxsusdur.