Benzində kəskin dəyişiklik | Qiymət, vergi və rüsum barədə xəbər

Azərbaycana idxal olunan benzin üçün aksiz vergisi kəskin azaldılıb, gömrük rüsumu ləğv edilib.

Bu, Nazirlər Kabinetinin “Xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri”ndə etdiyi dəyişiklikdə əksini tapıb.

Baş nazir Əli Əsədovun yeni qərarına əsasən, martın 1-dən ölkəyə idxal olunan benzin gömrük rüsumundan azad edilib.

Bundan əlavə, Nazirlər Kabinetinin ölkə ərazisinə gətirilən aksizli malların aksiz dərəcələri ilə bağlı qərarında da dəyişiklik edilib. Yeniliyə əsasən, 2024-cü ilin sonuna qədər aviasiya benzinləri istisna olmaqla mühərrik benzinlərinin hər tonu üçün aksiz vergisi 200 manatdan 1 manata endirilib.

Eləcə də benzin emalında istifadə olunan qazoyllara görə bəzi yanacaq növlərində aksiz vergisi 80 manat müəyyən edilib. Bəzilərində isə bu rəqəm 2024-ü ilin sonuna qədər 1 manata endirilib.