Bu enerji infrastrukturu həcminə görə MDB-də ilk olacaq

Azərbaycanda bərpa olunan enerji mənbələrinin sürətli inkişafı üçün böyük miqyasda Batareya Saxlanc Sistemlərinin yaradılmasına başlanılıb.

Belə ki, “AzərEnerji” tərəfindən paytaxta yaxın 500 kilovoltluq “Abşeron” yarımstansiyasının və ölkənin mərkəzi hissəsində yerləşən 220 kilovoltluq “Ağdaş” yarımstansiyasının ərazisində ümumilikdə gücü 250 meqavat, tutumu 500 meqavat saat olan Batareya Saxlanc Sistemləri yaradılır.

Hazırda yerlərdə lazımi tikinti işləri görülür və elementlərin sifariş əsasında istehsal edilərək sahəyə gətirilməsi üzrə işlər aparılır. Bu həcmdə sistemlərin tətbiqi təkcə Azərbaycanda deyil, bütövlükdə MDB məkanında ilk olacaq.

Qeyd edək ki, Batareya Saxlanc Sistemlərinin yaradılması enerji sisteminin dayanıqlığının yüksəldilməsi, tezliyin sabitliyi, bərpa olunan enerji mənbələrində kəsintilərin azaldılması, aktiv güc çatışmazlığının kompensasiyası, pik yüklərin qarşılanması, günəşin batma saatlarında yük qrafikinin hamarlanması və qəza zamanı enerji sisteminin sıfırdan bərpası baxımından olduqca əhəmiyyətlidir.

Bu sistemlərin tətbiqi Azərbaycanın enerji müstəqilliyini möhkəmləndirməklə yanaşı, həm də enerji sistemini qonşu ölkənin sinxron zonası ilə paralel və ada rejimlərində etibarlı işləməsini təmin edəcək.