Bu ölkələr iflasa yaxınlaşacaq | Qlobal borc niyə rekord həddə çatır?

Dünya iqtisadiyyatında hökm sürən qeyri-müəyyənlik fonunda qlobal borc ən yüksək səviyyəyə qalxa bilər.

Bu barədə Beynəlxalq Valyuta Fondu xəbərdarlıq edib. Bundan isə ən çox avrozona təsirlənəcək.

Fond dünya ölkələrinin borclarının 2025-ci ildə 2,8 faiz bəndi artaraq ümumi daxili məhsulun 95 faizini təşkil edəcəyini proqnozlaşdırır.

Məlumata görə, ABŞ-nin bir sıra tarif elanları və digər ölkələrin əks-tədbirləri maliyyə bazarlarında volatilliyi artırıb, artım proqnozunu zəiflədib və riskləri yüksəldib.

Fransa və Almaniya üçün proqnozlar xüsusilə qorxuludur və bu, heç bir ölkənin 2030-cu ilin sonuna qədər büdcə kəsirlərini ümumiyyətlə davamlı hesab edilən səviyyələrə endirə bilməyəcəyini göstərir. Baş verənlərin təsirləri isə daha çox kasıb ölkələrdə hiss olunacaq.

Beynəlxalq Valyuta Fondu ən pis halda qlobal borcun səviyyəsinin 2027-ci ilə qədər ÜDM-in 117%-nə çata biləcəyini deyir. Bu da İkinci Dünya müharibəsindən bəri görünməmiş yüksək göstəricidir.