Çexiya Sənaye və Ticarət Nazirliyindən SOCAR ilə əməkdaşlığın önəmi barədə açıqlama - Baku TV

Azərbaycan Çexiyaya xam neftin əsas tədarükçülərindən biridir və SOCAR ilə əməkdaşlıq ölkənin enerji təhlükəsizliyinin mühüm elementidir.

Bu barədə “Trend”ə Çexiyanın Sənaye və Ticarət Nazirliyindən bildirilib.

Qeyd olunub ki, Azərbaycan artıq bir neçə ildir Qara dəniz üzərindən enerji dəhlizi layihəsini irəli sürür və bu layihə Avropa İttifaqının ümumi maraq layihələri sırasına da daxil edilib.

Əlavə edilib ki, Avropa İttifaqında elektrikləşmənin artması və enerji istehlakının yüksəlməsi fonunda qarşılıqlı faydalı tərəfdaşlıq üçün böyük potensial mövcuddur. Çexiyada turbinlər, istilik nasosları və günəş fotovoltaik sistemləri də daxil olmaqla enerji komponentlərinin istehsalı üzrə inkişaf etmiş sənaye var.

Azərbaycanın xüsusilə günəş və dəniz küləyi enerjisi sahəsində böyük bərpaolunan enerji potensialı əməkdaşlıq üçün geniş imkanlar yaradır. Çex şirkətləri mühəndis xidmətləri, avadanlıq istehsalı, hidrogenin saxlanması sistemləri və enerji səmərəliliyi həlləri kimi sahələrdə töhfə verə bilər.