Əcnəbi sahibkarların daimi yaşama icazəsi üçün şərtlər

Əcnəbilərin xarici investisiyalı hüquqi şəxslər və sahibkarlıq fəaliyyəti əsasında yaşama icazələri əldə etməsi üçün yeni tələblər müəyyən edilib.

İqtisadiyyat Nazirliyinin Kollegiyasının Qərarına əsasən, xarici investisiyalı hüquqi şəxsin rəhbəri və ya həmin hüquqi şəxsin paylarının azı 51 faizinə sahib olan təsisçinin ölkə ərazisində müvəqqəti yaşama icazəsi əldə etməsi üçün nizamnamə kapitalı 50 min manat müəyyən edilib.

Bu əsasla azı 1 il ölkə ərazisində müvəqqəti yaşamış şəxsin yenidən müvəqqəti icazə alması üçün hüquqi şəxsin son 1 ildə dövriyyəsi 100 min manat olmalıdır. Eyni əsasla daimi yaşama icazəsinin verilməsi üçün isə nizamnamə kapitalı 100 min manat, son 1 ildə dövriyyənin həcmi isə 200 min manat təsbit edilib.

Bundan əlavə, ölkədə azı 1 il sahibkarlıq fəaliyyəti ilə məşğul olmaq əsası ilə müvəqqəti yaşamış əcnəbilərə müddətin uzadılması üçün həmin şəxsin son 1 ildə dövriyyəsi 50 min manat olmalıdır. Eyni əsasla daimi yaşama icazəsi üçün isə son 1 ildə dövriyyə 100 min manat məbləğində müəyyənləşdirilib.

Bu tələblər investisiya təşviqi sənədinə və ya “Startap” şəhadətnaməsinə malik olan, Qarabağ və Şərqi Zəngəzur iqtisadi rayonlarında fəaliyyət göstərən sahibkarlıq subyektlərinə, habelə qeyri-kommersiya hüquqi şəxslərinə, sənaye parkının, sənaye məhəlləsinin və aqroparkın rezidentlərinə aid deyil.